Ƙungiyar Ɗaliban ƙaramar hukumar Ɓagwai, da ke jihar Kano, ta yi Allah-Wadai da yadda Mahukunta, ke nuna halin ko inkula game da harkokin Ilimi, a ƙaramar hukumar.
BALSA, ta bayyana wannan mataki ne, ta cikin wata sanarwa da Jami’in Bincikenta (Auditor General), kuma shugaban kwamitin Ilimi na ƙungiyar, Comrade Abdullahi Usman Wakili, ya aikowa Jaridar Rariya Online, da safiyar Alhamis.
Sanarwar kuma, ta ƙara da fito da halin ƙaƙanikayin da Ilimi ya tsinci kansa a ƙaramar hukumar, da ma yadda kowanne ɓangare na mahukunta ke kawar da kai, game da batun.
Inda, ƙungiyar ta BALSA, ta buƙaci masu ruwa da tsakin ƙaramar hukumar da su haɗa hannu waje guda, dan ganin an haɓɓaka fannin na Ilimi.
Ka zalika, ƙungiyar ta ƙara da roƙon mahukuntan kan su sa ɗamba, ta hanyar fara biyawa Ɗalibai kuɗaɗen Jarrabawar neman shiga manyan makarantu (JAMB UTME), ta wannan shekarar (2024).
