Ma’aikatar Ilimi ta jihar Kaduna, ta sanar da ƙara hutun makaranta ga Ɗaliban Makarantun Firamare da Sakandiren Jihar, zuwa ranar Lahadi, 24 ga watan Satumbar da mu ke ciki, ga Ɗaliban Makarantun Kwana, da kuma 25 ga watan na Satumba ga Ɗaliban Makarantun Je Ka Ka Dawo (Day).
Bayanin hakan kuma, na ɗauke ne ta cikin wata sanarwa da Kwamishinan ma’aikatar Ilimin Jihar ya fitar, mai ɗauke da sa hannun, Babban Sakataren Ma’aikatar, Dr. Halliru Musa Soba, wacce kuma ke ɗauke da kwanan watan, 08 ga watan Satumban 2023, wacce kuma aka aike ga dukkannin Shuwagabannin Makarantun Firamare da Sakandiren Jihar, tare da Shugaban ƙungiyar Iyayen Yara da Malamai (PTA), da Shugaban NAPPS na Kaduna, da ma dukkannin Makarantu masu zaman kansu, da na sa kai, Sai Shugaban ANCOPSS na Kaduna, da Shugaban Kwamitin SBMC, da ma Shugaban ƙungiyar Malamai (NUT) reshen Jihar ta Kaduna.
Sanarwar ta kuma buƙaci Iyaye da sauran masu kula da yara da su kiyaye da wannan sabuwar rana, ta na mai cewar, za a saki sabuwar kalandar karatu wacce ke ɗauke da ɗagawar da aka yi, a nan kusa.
