Gwamnan Jihar Kano, Abba Kabir Yusuf, ya bayyana cewar, Gwamnatinsa za ta kashe kimanin Naira 79,284,537 wajen sake farfaɗo da wasu Makarantun Kwanan Jihar guda 11.
Gwamnan ya bayyana haka ne, a yau (Juma’a) ta shafinsa na Facebook, inda ya ce hakan ya biyo bayan amincewa da batun da aka yi ne, a zaman majalissar zartarwa na biyar, da ya Jagoranta, a jiya.
Waɗannan maƙudan kuɗaɗe kuma, wani sashe ne daga cikin, Naira 4,882,378,071 da Gwamnatin ta ware, wajen gudanar da wasu muhimman ayyuka, a jihar ta Kano.
“Taron Majalissar Zartarwar Kano na 5, wanda na Jagoranta a jiya, ya amince da kashe kimanin Naira 79,284,537 wajen farfaɗo da Makarantun Kwanan da aka yi watsi da su guda 11, a Jihar nan.
“Wannan kuma, wani ɓangare ne, daga kimanin Naira 4,882,378,071 da aka saki, domin gudanar da muhimman ayyuka da dama, a wannan Jiha. – AKY”.
