Gwamnatin Kano ta amince da hada guiwa da rukunin kafafen yada labaran Media Trust, da ke wallafa Jaridar Daily Trust, kuma mamallakan Gidan Talabijin na Trust TV da Trust Radio, domin gudanar da taron bunkasa tsaro a yankin Arewa maso Yamma.
An cimma yarjejeniyar ne a jiya, ya yin da shugaban gamayyar daraktocin kamfanin, Malam Kabiru Yusuf, ya kaiwa Gwamnan Kano, Abba Kabir Yusuf ziyara, a gidan Gwamnati.
Ta cikin wani jawabi da ya fitar, mai magana da yawun Gwamnan Kano, Sanusi Bature Dawakin-Tofa, ya bayyana cewar, shugaban rukunin kafafen yada labaran na Media Trust Group ya kaiwa Gwamnan Kano ziyara ne, domin bayyana masa shirinsu na shirya taro kan tsaron jihohin Arewa maso Yamma guda bakwai, tare da shirinsu na hada guiwa da gwamnatin wajen gudanar da taron, da sauran alámura.
