Majalisar dokokin jihar Kano, ta amince da ƙudurin dokar samar da hukumar kula da titunan karkara ta jihar Kano (KARARA).
Mataimakin Shugaba, Wanda ya jagoranci zaman majalissar, a madadin Shugabanta, Alhaji Kabiru Hassan Dashi ne ya gabatar da ƙudurin ranar Litinin, a zauren majalisar, inda daga bisani kuma majalissar ta amince da wannan ƙuduri, wanda a yanzu ya ke a matsayin doka.
Hakazalika majalissar ta karɓi wasiƙa daga majalissar zartawar Gwamna mai barin gado, Dr. Abdullahi Umar Ganduje, wacce ke neman sahalewar majalisar domin naɗa, Dr. Ibrahim Yakasai, a matsayin shugaban Asibitin Koyarwa na Muhammad Abdullahi Wase, wanda a yanzu ke a matsayin Asibitin koyarwa na ɗaliban Jami’ar Jihar ta Yusuf Maitama Sule, da ke birnin Kano.
Bayan duba kan wannan ƙuduri kuma, majalissar ta amince da sake zama a yau, domin tattaunawa kan yiwuwar naɗa, Dr. Ibrahim Yakasan, a matsayin shugaban Asibitin.
