Babban Kwamandan rundunar nan da ke umarni da kyawawan ayyuka, tare da hani da munana (HISBAH) ta jihar Kano, Sheikh Aminu Ibrahim Daurawa, ya bada wa’adin makonni biyu ga Fasiƙai, Karuwai, har ma da Ƴan Daudun da ke son tuba, tare da gyara halayensu, da su halarci ofishin hukumar, domin karɓar nasihohi, tare da form ɗin jari.
Daurawa, ya bayyana hakan ne, a daren Litinin, ya yin da ya ke zantawa da sashen Hausa na BBC, kan sakamakon tattaunawar sulhun da su ka yi da Gwamnan Kano, Abba Kabir Yusuf, tare da komawarsa kujerar shugabancin hukumar ta HISBAH, bayan bayyana ajiye muƙamin da ya yi, a ƙarshen makon da ya gabata.
A tattaunawar tasu kuma, Daurawa ya ce Gwamnan ya yi alƙawarin samarwa da hukumar ƙarin kayayyakin aiki, domin bunƙasa ayyukanta.
Ka zalika, ya ce za a samar da makaranta ta musamman mai suna ‘Hisbah Training School’ da za ta dinga horas da Jami’an hukumar, ba ya ga sashen fasahar zamani da za a samar, haɗi da sashen kula da al’amuran shari’a.
