Kwamitin da ke da Alhakin shirya gasar ajin ƙwararru ta ƙasa, haɗin guiwa da GTI, da ma Hukumar bunƙasa wasanni a nahiyar Afirka, sun samu tagomashin maƙudan kuɗaɗe kimanin Dalar Amurka Miliyan 5, da aka damƙa musu domin yin amfani da ita wajen haska wasannin da za a gudanar, ta kafafen sadarwa na zamani, a kakar wasanni ta 2023 zuwa 2024.
A ranar Talata ne dai, sashen da ke da alhakin shirya gasar ajin ƙwararrun ta ƙasa NPFL, ya bayyana cewar gasar zata kasance ta farko a nahiyar Afirka, da za a yi amfani da fasahar Artificial Intelligence, a ya yin gudanar da ita.
Ana kuma sa ran za a dinga haska wasannin ne ta manhajar NPFL Live, wacce manhaja ce da zata bada damar nuna wasannin kaitsaye a lokutan da ake gudanar da su, tare da bawa magoya baya damar more sassauƙan tsarin da manhajar ke da shi kan shaánonin wasannin gida, dama na ƙasashen ƙetare.
