Aƙalla mutane 67 aka kai rahoton ɓacewarsu, ga rundunar ƴan sandan jihar Gombe, cikin watanni tara.
Da ya ke tabbatar da hakan, a ya yin zantawarsa da Jaridar PUNCH, ranar Talata, Kakakin rundunar ƴan sandan jihar, ASP Mahid Abubakar, ya ce an kai rahotannin ɓacewar mutanen ne, daga ƙananan hukumomi 11 da ke Jihar. Mutum 65 ne dai aka bayyana ɓacewarsu, ya yin da 2 kuma ake kan tuntuɓa, wanda ya kai jimillarsu zuwa 67.
Abubakar, ya kuma ce, an samu waɗannan rahotanni ne, daga watan Janairu, zuwa Satumban 2023.
Ya kuma ce, mafi yawa Iyalan waɗanda aka rasa ɗin ne, su ke shigar da ƙorafi ga hukumar ƴan sanda.
A ƙarshe, ya tabbatarwa da Mazauna jihar ta Gombe cewar, Kwamishinan ƴan sandan jihar, Oqua Etim, tare da Jami’ansa, na yin iya bakin ƙoƙarinsu, wajen ganin sun samar da tsaro, ga al’ummar Jihar, “Dan haka babu buƙatar fargaba” a cewarsa.
